Con «O tradutor de sombras», volve a narrativa singular da escritora Moncha Fuentes á actualidade para arrastrar o lector nunha novela hipnótica que comeza en Ourense e remata en Vigo pouco antes do inicio da pandemia.

Entre a realidade e a desmesura, Roque Corbal procura no alcohol e na tradución un refuxio contra as súas propias pantasmas. Ao longo da súa crise interior, irá entregándolle a palabra a personaxes tan relevantes que deseñarán a arquitectura coral da obra:

• Néstor, coas súas vivencias políticas e a traxedia persoal que o envolve.
• Camila Ferro e a súa turbadora historia de amor e morte.
• Arcadio Corbal e a súa experiencia psiquiátrica.
• Inés Lostre e Simón Cibeira, que representan a face máis esgazadora da doenza mental.

Fondamente marcada polo ritmo, a novela desprégase nunha polifonía de tons diversos e disonantes que acadan a harmonía no conxunto final, consolidando unha orquestra poderosa contra a morte e o esquecemento.